Jarðgangnamál í Fjallabyggð
- Mar 29, 2021
- 2 min read
Fyrr í þessum mánuði átti ég orðastað við samgönguráðherra um jarðgangnamál í Fjallabyggð.
Spurningarnar voru eftirfarandi:
1. Hvaða úrbætur á samgöngumannvirkjum og samgönguframkvæmdir telur ráðherra rétt að ráðast í, annars vegar til skemmri tíma og hins vegar lengri tíma, til að bæta samgöngur á norðanverðum Tröllaskaga og tryggja öruggar heilsárssamgöngur?
2. Hvenær telur ráðherra að ráðast eigi í varanlegar úrbætur með nýjum göngum á milli Dalvíkur og Ólafsfjarðar annars vegar og milli Fljóta og Siglufjarðar hins vegar?
3. Sér ráðherra aðra kosti fyrir sér í stöðunni?
Herra forseti.
Þetta er ekki í fyrsta sinn og líklega ekki það síðasta sem ég tala um samgöngubætur á Tröllaskaganum. Ég held ég hafi gert það á einhverjum tímapunkti á hverju einasta ári frá því að ég kom fyrst inn á þing.
Ég er með þrjár spurningar sem ég legg fyrir ráðherra. Þær koma til út af því ástandið bæði í vetur og fyrravetur sem hefur verið úr hófi fram slæmt og með þeim hætti að ítrekað hefur lokast vegna ófærðar, snjóflóða og snjóflóðahættu. Íbúar í Fjallabyggð hafa þurft að búa við ástand sem er algerlega óásættanlegt. Við vitum alveg að eðli máls samkvæmt gerðu t.d. Héðinsfjarðargöng á milli Siglufjarðar og Ólafsfjarðar lífsskilyrði okkar í Fjallabyggð mun betri og tengdu auðvitað svæðin saman. Það hefur orðið stórsókn í ferðaþjónustu í Fjallabyggð.
Varðandi Múlagöngin hins vegar þekkjum við það líka að þau eru flöskuháls hinum megin. Ný göng, eða hvaða bætur sem við leggjum til að farið verði í, er alla vega eitthvað sem þarf líka að horfa til. Eins og ég sagði eru snjóflóð að hamla því eða hætta á að þau hamli því að fólk geti búið til eitt atvinnusvæði, búið til eitt ferðasvæði eða bara yfir höfuð sótt sér læknisþjónustu og annað slíkt.
Siglufjarðarvegur um Almenninga er líka mjög hættulegur vegna jarðsigs og því velti ég því upp með ráðherra hvort ekki sé best að vera með nýtt vegstæði úr Fljótum til Siglufjarðar, fyrir utan að það myndi stytta vegalengdina á milli Eyjafjarðar og Skagafjarðar, treysta byggð í Fljótum og auðvitað stórauka öryggi vegfarenda. Ég man ekki eftir öðru en að jarðsigið hafi verið dálítið mikið þegar ég var lítil og það hefur bara aukist og svæðið stækkað.
Það er hægt að horfa til vina okkar Færeyinga sem hafa grafið í kringum 20 göng sem eru samtals 55 km. Það er u.þ.b. sjöfalt lengra en við höfum grafið á hvern íbúa. Við erum hér með 12 göng, ef ég veit rétt, sem eru í kringum 50 km. Þar er stefnan alltaf að grafa göng á hverjum tíma. Færeyingar grófu göng fyrir 15 íbúa þannig að það snerist ekki bara um hagkvæmni heldur líka jafnræði. Mér finnst það líka eitthvað sem við þurfum að hafa í huga.
Við getum ekki beðið í áratugi eftir úrbótum í samgöngumálum sveitarfélagsins. Því spyr ég, af því að ég veit að hópur með heimamönnum og fulltrúum okkar þingmanna í Norðausturkjördæmi hefur hafið störf og er að leggja á ráðin með tillögur í samstarfi við aðila, hvort ráðherrann taki ekki vel í málið og hvort hann telji að það sé ekki bráðnauðsynlegt í ljósi aðstæðna að við setjum úrbætur á þessu svæði í aukinn forgang miðað við það sem núverandi áætlanir gera ráð fyrir.
Hér má horfa á umræðuna og svör ráðherra.
Hér er líka tenging á viðtal m.a. við fyrrverandi slökkviðlisstjóra Fjallabyggðar vegna ástands Múlagangna. https://www.visir.is/g/20212090629d/ottast-banaslys-vegna-kaeruleysis-theirra-sem-styri
Comments