Ungmenni - nám og störf

Hagstofa Íslands birti í gær í fyrsta skipti tölur um hlutfall og áætlaðan fjölda ungmenna sem standa utan skólakerfis og vinnumarkaðar. Þar kemur ýmislegt áhugavert fram sem vert er að hafa í huga þegar við ræðum málefni ungs fólks. Áætlað er að sex prósent ungmenna á aldrinum 16-24 ára hafi ekki verið í vinnu, námi eða starfsþjálfun á síðasta ári, eða tæplega 2400 ungmenni.

Samkvæmt Alþjóðlegu vinnumarkaðsstofnuninni getur þessi hópur verið í áhættuhópi fyrir félagslega einangrun og skort á efnislegum gæðum vegna þess að hann aflar sér hvorki atvinnutekna né byggir upp færni sína með aukinni menntun eða þjálfun.

2400 ungmenni hljómar eins og há tala og vissulega þarf að hafa auga með þessum hópi, veita þeim þá ráðgjöf og þjónustu sem þau þurfa á að halda.

Samt sem áður er þetta hlutfall með því lægsta sem þekkist í Evrópu. Einungis tvö lönd í Evrópu hafa lægra hlutfall ungmenna sem ekki eru í námi, vinnu eða starfsþjálfun.

Hlutfall þessa hóps er nú aftur orðið svipað því sem þekktist hér á árunum fyrir hrun. Hins vegar hefur bilið á milli karla og kvenna án vinnu, náms eða starfsþjálfunar aukist síðustu ár. Ýmsar ástæður gætu verið fyrir þessum mun samkvæmt hagstofunni og enn og aftur er kynjamunurinn hér á landi minni en annars staðar í Evrópu.

Virðulegur forseti. Það er eitt af heimsmarkmiðum Sameinuðu þjóðanna, sem Ísland er aðili að, að lækka verulega hlutfall fólks á aldrinum 15-24 ára sem er ekki í vinnu, námi eða starfsþjálfun. Þar virðumst við standa okkur ágætlega, en sofnum ekki á verðinum þegar kemur að unga fólkinu okkar.